Notum sit omnibus fidelibus, presentibus et futuris, magnis et parvis, liberis et servis, quod ego Wido cum conjuge Elisabeth et filio Poncio recordans sentenciæ dicentis: «Facite vobis amicos de Mammona iniquitatis», illiusque: «Date ælemosinam et omnia munda sunt vobis»; ob absolutionem meorum criminum ac cunctæ mee cognationis, offero et dono Deo et ejus sanctis apostolis Petro ac Paulo Cluniensis cœnobii fratribusque inibi commorantibus, portiunculam quandam meæ hereditatis subtus annotatam, jure perpetuo possidendam, videlicet in villa de Curcellis mansum qui dicitur de Ulmo, XII jugera terræ, tria plaustra fœni, usum aquæ, in silva longe lateque quingentorum porcorum pascua, et omnes usus qui fratri hoc idem tenenti fuerint placiti et necessarii.